Nalazite se na:

Svjetsko prvenstvo

E-mail Print PDF
User Rating: / 11
PoorBest 
There are no translations available.

Evo kako svjetsko prvenstvo u nogometu koje je upravo počelo, najavljuje naš dopisnik iz Kanade, Danilo Kozulić!

Nuko, isili udluci za koga ces se sikirati na svjetskomu prvenstvu. Ko nisi jua cu ti malo pumoci, jer jua jes. Vako: 
 
Narodna Demokratska Republika Koreja!
 

Zuac? Evo zuac?
 
1) Lipe Nase nima.
2) Vatikan i Monaco nisu najke igrali kvalifikacije. Ma i da isu nibi za njih, jer bi ih na Istu bilo i privise za njih pa se nibi imi sukin kuntristati. 
3) Nisu nan susedi! (to in je veli, veli plus)
4) Oni niznaju nuas, mi niznuamo njih (i to in je veli plus)
5) Niman pojma kako igraju, nikad ih nis pazi, niznun in najke inoga igraca, znun suamo da imaju pitalisest Kimova i isto tuliko Pakova (to in more biti  plus i minus)
6) Ako in zagulu gol va zuadnjimin sikundamin, i tako zgubu utakmicu ili zgubu na penali, biti ce me briga isto kuliko me briga za prvaka Nepala va kriketu (to je mini veli, veli plus)
7) a puno san se misli:
- Handanovic je kupi teren na Istu. More biti bi tukalo navijati za slovenci posli uvoga referenduma?
- Vera mi ni dua da navijan za Srbiju.
- Za Inglezi necu, znua se zuac.
- Njemci mi gredu vise na k...., uvik su slabi, nemaju ni igraci ni ekipu, pa jopet nikakor dojdu du finala!? Kako???
- Talijani - fuj! Nimorin ih vise viti stampuani. Svi su uni Materazzi!
- Niduaj Boze da Merika dubije!
- Garcimin nibi pumogla ni svjeska banka!
- Holandezi su mi druagi, ali kad tukaju biti nuajjacji unda su ko njihovo 'ebeno cvece.
- More biti bi bilo dubro da Gaucosi budu parvi pa da se maradona svuce gol kako je ubicua!
- A ako Brazil dubije to ti je ko da pazis rrprizu Dinastije. Dosadno!
- Purtugezi nisu slabi, ali su k'o garmualji va vrici, gori ud nuas.
- Za Francuzimin san pijun kuliko i Irci. A znuate i suami kuliko su Irci popili na racun unoga gola.
- Slovaci su vec i privise ucinili, pa kad bi jos i vise to nibi bilo dubro za nas.
- I Novi Zeland se kvalificira!?!? Ma sve je slo zdijuavlun.
- Australiju ni volin radi Simunica (Kad ce tuaj vise nazad va Australiju!!? Dusuadi je Bogu i ljudimin ili suamo mini? Bolje da je Skoko ustua, a un sua). Uni bi idino nikoga mogli priskuciti, a ne dubiti!
- A nibi me zacudilo da FIFA naredi Japancimin da se turnaju doma jer imaju niki novi niduzvoljeni cipici na kopackama, pa in se balun takiva za nogu ko Livericu.
- Juzni Korejci su mi uvik bili mutni, ko i more na Piriliscu pu furtuni juga. Nikad niznuas ca mislu, a kamoli ca cinu, zuato su i ucinili Hyundai da svih privaru.
- Kako su Danci pasali uvoga puta? Koga su zbarcali da bi uni sli? Juge vise nima...
- Svicarci su tako suplji, pa jopet uvik pasaju. Imaju puno kantuno pa se udbija na sve struane i nikad niznuas kamo ce finiti.
- A i tuaj Meksiko je uvik na prvenstvu. Tukalo bi va kvalifikacijamin zmisati srednju i sjevernu meriku i balkan! Da si pazi utakmicu Honduras kontra Kanade znua bi ca guvorin.
- A pugledaj molin te lipo domacini. Uni su dobili zuadnjih 700 prijateljskih utakmic. Da je pu Blateru un bi njimin odmah dua pehar i biz igrati, a za nuajboljega igraca bi mogli pruglasiti Mandelu.
- Paragvaj ima lipu bandiru. Ako se njihova bandira digne na kraju niki bi zdalikoga moga pumisliti da je Lipa Nasa Prvak!
- Urugvajci su privise zaokupirani sucimin, suci su in krivi za sve i idino Forlan igra i zabija. More biti imaju pravo. Siguro pratu nase novine.
- Za Kamerun necu radi unih sporkih majic.
- Za Obalu Slonovace necu radi Ericksona. Ca uvi stuari jos nisu skapulali penziju?!
- A ca ce Nigeriji parvo mesto? Imaju naftu i pu tomu su vec na parvomu mestu. Suamo da i njimin ni pocme stikati ko Mirikanimin!
- Niman najke idun razlog navijati za Ganu.
- Ni za Alzir. Jos je suamo Somalija falila, pa da slika bude kumpletna!
- Nima nijenoga z Bliskoga Istoka, a niti unoga malo manje bliskoga.
- Ca nisu mulali Indiju da ide. Cudi me! Bas me cudi! Mogli su prudati bar inu puar stotin milijuni majic vise.
 
Na, sad mi je dosa prijatelj Juan (Atletico Madrid) i dunesa jagod i angurije. Nima mi druge. Aupa Atleti! E viva Espana! Da uni dubiju bar mi nibi bilo zua. Uni nuas dubiju va svemu i biz suco: nogomet, kosarku, rukomet, tenis, vaterpolo, odbojku...Ajde, dubro kad goli i mi njih. 
 
Isulin koga zaburavi? Je li te pijazua? Oce li ti pumoci? Ako ne unda citaj Slobodnu, ili ak se volis zuarun stati Jutarnji! Tamo ce ti uni sve puno bolje objasniti nego jua.
 
Ajde lipi pozdrav i bice golo! Ali ne suvo balo na sliki, nego z novo "Jabulani" ca svi njergaju da ni valjua. Stanca se va Kini, ca bi utili?!
 
Danilo
 
Ps. A zuac je Grant potpisua za mlatici (WH)? Ca se Bilic ni cipua toga pusla? Tamo ga puznivaju. Ca se mene tice moga je komodno pojti tamo i pripuruciti in Mamica za Izvrsnog Dopredsjednika. Ca bi ih barzo zludi, nibi znali je li pazu balun ili polo!

Last Updated ( Tuesday, 22 June 2010 20:57 )