Nalazite se na: Naslovnica Otok Ist Povijest otoka Ista BARBA JUSTO

BARBA JUSTO

Email Ispis PDF
Ocjene: / 2
LošNajbolji 

Barba Justo je bi baseti cuvik, ali je bi veli cuvik. Bi je puno stimun i na gluasu. Uvik je bilo, barba Justo uvo, barba Justo uno. Uz barba Justa nisi moga pasati ni bu ni bunora, as se je du barba Justa darzalo. Ni bilo lafko ćemo, nog to ćemo vako i vako.

 

Ekola. Velo viselje je bilo kad bi mi barba Justo reka da ćemo sutra zjutra z batelico pojti na Sistrice dati uvcun vude. Batelica se je dubro vuzila, ma kad je bilo mistruala, ud Binusa du Sistric je dubro tukalo stipliti ruke. Kad je bilo fosko, tua Sistrica se je parila koda je v Tualiji. Kako je, kao ni, dopotanto bimo arivali na Sistricu. Bestije ud uvuac bi dosle na skuanj. Puznivale su une barba Justa. Kad bi se napile, barba Justo bi in dua i bubić kruha, as ni bilo ubiluncije. Posli toga bi reka, ala muali sad ćemo i mi nic marindati. To je uvik bilo bubić kruha i malo suhih smokav. Znalo je biti i smukvinca Posli toga pruavo viselje zuame.

Barba Justo bi ubuka carni ikitun i stavi arćuas na rame. Pumalo bi tulećimin hudi pu skracamin kulu Sistrice, oće li viti suape. Jua san murua huditi dosta diliko za njin. Intanto, pari mi se da nikad ni ćipua nijenu suapu. Nikuntua.

Ima jos. Za sve ca ti se je dugudilo tukalo je pojti barba Justu. Ako si pua i udri se, ako si se zagribisljua, barba Justo će ti to pumazati zabe ulje. Ako ti je cep sua va butilju, ni nog ga znem. Barba Justo je imi urdenj za zneti cep z butilje. Tuah urdenj je bi ucinjen ud igual ud lumbrele. Ako ti sigac dubro ni pili, nog zadiva, ala barba Justu. Parvo tukua dati sigacu puta i drugo z trijungulun malo naustriti zubi. Ako ti je siglić pua v usternu. Barba Justo ima drakmuar.

Ki se more spuminjati ca je sve barba Justo moga ucinti. Va njigovoj baraki sve je bilo adutuano i na mestu. Urdenji su stuali na skancijamin, a niki su visili. Ca je sve bilo baraki, ni bi stalo va dvua libra. Barba Justo je imi carni obli ućuali, uzuad vezani spuagun. Za nuas dicu jos je bilo velo viselje kad je vecer bila bunaca. Ubu bi barba Justo visoke stivale, vaze suablju i vuazga karburku. Mi smo ko ludi hudili za njin krajin i cekali kad će z suabljo ubiti koga ćifla.

Ima jos ina storija. Pojti na skolj na ciparini. Jopet viselje. Uvuah put z batelico na Muaslinjak na ciparini. Z udico na prutiću bi zguljuvua z buze ciparini. A kaleba juaja. Tarmerka je bila najbolja za to. Kad bimo nuasli dosta tih juaj, tukalo ih je staviti va more za viti ki su dubri, a ki nisu. Ki plavaju nisu dubri. Kalebi ni nog da nas puidu. Sad je tukalo marindati. Vazela bi se prasura i kapić ulja za frigati juaja. Barba Justo utvara juaja i una kua su dubra, stresa va prasuru. Utvara tako ino juaje uzgor prasure, a uno već pukvuareno, suamo ca ni kalebić v nutrih, a isto je to stresa i zamisua vnutra.

Ni mu to bas puno marzilo. Koga barba Justo ni bagamua, reka bi da je taneko, salvadigo, buzdo, vizdikaco, oli murlako. Barba Justo je imi pridivak Artina.

Jos malo. Kad je tukalo ubiti pruasca, to je bi pruavi trijatar. Parvu vecer parćua bi kutua za stipliti vodu, unde doli va kantuniću. Trapije, a uzdol darva. Sutra jutri suamo furmin nazgati. Sve je bilo prunto. Nuzi naostreni, mluat, kunop za vezati pruasca za nogu. Napose kunopcić za vezati pruascu cunku. Pasuade za brijati dlake, a tukua i kacol za pulivati teplu vodu. Tukua dosta karp, as je to sporak pusua. Zinske avizuane. Muka ud farmintuna sameljena. Citire muskua. Dica ubliću ki će skapulati mihur. Kako je kako ni, i mihur je bi dobar za balun. Svi su sturnuti, ma kad barba Justo direi, unda je siguro sve alavija.

A ki se more sve spuminjati ud barba Justa. Gracina, Ripisće, Mliduar. Tamo je barba Justo hudi ko na pir. Torba kulu raminua. Uvik vnutrih kuagoli smokva za njigove ovce.

BARBA JUSTU NA SPOMEN !

 

Ante Smoljan

Zadnja izmjena ( Utorak, 21 FEBRUARY 2012 18:18 )